Carnage | කානේජ් හැදින්වීම

Venom මුල් චිත්‍රපටය නිකුත් වෙන්න කලින් සිම්බියෝට් කෙනෙක් කියන්නෙ කවුද, වෙනම් කියන්නෙ කවුද වගෙ කරුණු ගැන හැදින්වීමක් කරපු නිසා මේ වතාවේ Venom: Let There Be Carnage චිත්‍රපටයෙ උපසිරැසි ගේන්න කලින් කවුද මේ කානේජ් කියන්නෙ කියලා විස්තරයක් කරන්න ඕන කියලා හිතුවා.

චරිතේ හැදුනේ කොහොමද?

මාවල් කොමික් හරහා වෙනම්ගෙ චරිතය හදුන්වාදීමත් එක්ක මේ චරිතය සෑහෙන ප්‍රසිද්ධියට පත් වෙනවා. ඒකෙ ප්‍රතිඵලයක් විදිහට තමයි කානේජ් (Carnage) කියන චරිතය නිර්මාණය වෙන්නෙ. David Michelinie, Mark Bagley දෙදෙනා යටතේ නිර්මාණය වෙන මේ චරිතය මුලින්ම කැමියො එකක් එහෙම නැත්තම් පුංචි මුහුණුවරක් විදිහට ගෙන එන්නෙ 1992 පෙබරවාරි මාසයේදී නිකුත් වූ The Amazing Spider-Man 359 වැනි කොමික් කලාපය හරහා. ඒවගේම සම්පූර්ණ මුහුණුවර රැගත් කානේජ්ව දැකගන්න ලැබෙන්නෙ 1992 වසරේ අප්‍රේල් මාසයේදී නිකුත් වූ The Amazing Spider-Man 360 වැනි කොමික් කලාපය හරහා.

කානේජ් (Carnage) නමින් හදුන්වාදීමක් සිදුවෙන්න කලින් මාවල් කොමික් වලින් මේ චරිතය හදුන්වාදෙන්න තීරණය කරපු නම් කිහිපයක්ම තියෙනවා. මුල්ම නම තමයි ‘Chaos’ කියන්නෙ. මේ නම චරිතයෙ ප්‍රතිරූපයට ගැලපුනත් නැවත වතාවක් නම වෙනස් වෙනවා ‘Ravage’ විදිහට. ඒත් මේ වතාවේ රැවේජ කිව්වම සුපිරි (විලන්) දුෂ්ටයෙකුගෙ ගතියක් මතු වෙන්නෙ නැති නිසා මාවල් කොමික් වලින් අවසානෙට තීරණය කරනවා ‘Carnage’ නම යොදාගන්න.

කොමික් පසුබිම

කවුද මේ සිම්බියෝට්ලා කියන්නේ? මේකට පිළිතුර මීට කලින් අරං ආව Venom සම්බන්ධ ලිපියෙන් පැහැදිලි කලා. ඒ නිසා කානේජ් ගැන කියවන්න කලින් සිම්බියෝට්ලා ගැන දැනගන්න නම් ඒ ලිපිය අනිවාර්යෙන්ම කියවන්න.

කවුද එතකොට මේ කානේජ් කියන්නේ?

කානේජ් කියන්නෙත් සිම්බියෝට් පවුලෙ ඉන්න දරුණුම හා ශක්තිමත් කෙනෙක්. මෙයාගෙ ධාරකයා වෙන්නෙ ක්ලිටස් කැසඩි. ක්ලීටස් කියන්නෙ සෑහෙන දරුණු අපරාධකාරයෙක්. අපරාධ කරන්න මෙයා පෙළඹෙන්නෙත් එයාගෙ ජානමය විදිහට බලපාපු නිසයි. 17’වැනි සියවසේදී කෝ(ර්)ට්ලන්ඩ් කැසඩි කියන්නෙ තාම ආදරවන්තිය වෙච්ච මොලී රේවන්ක්‍රොෆ්ට් එක්ක වෙස්ට්චෙස්ටර් ජනදපයෙ ජීවත් වූ දෙන්නෙක්. වතාවක් මේ මොලීව සිම්බියෝට්ලගෙ දෙවියන් කෙනෙක් විදිහට සලකන ‘නල්’ අදහන පිරිසක් පැහැරගෙන යනවා. මේ අයව හදුන්වන්නෙ ‘The Others’ නමින්. මේ මිනිස්සුන්ගෙ දරුණු බව නිසාම ගම්මු වුනත් කැමති වෙන්නෙ නැහැ මොලීව බේරන්න යන්න.

ඉතිං මේ ගමන තනියම ගිහිල්ලා කෝ(ර්)ට්ලන්ඩ් මොලීව බේරගත්තත් ඒ වෙද්දී ඔහුව ලිවින් ඇබිස් නොහොත් සිම්බියෝට්ලගෙ ග්‍රහණයට ලක් වෙලා ඒ වෙච්ච ආසාදනය නිසා එයා එලියට එන්නෙ වෙනමම පුද්ගලයෙක් වෙලා. මේ විදිහට උමතු වෙච්ච කෝ(ර්)ට්ලන්ඩ් පිස්සුවෙන් වගෙ දොවන්න, දකින දකින අයට බනින්න පටන් අරං අවසානයේදී ඒක නවතින්නෙ ඒ ගමේ හිටිය අට දෙනෙකුත් මරලා දාලා. මේ නිසාම ගම්මු එකතු වෙලා කෝ(ර්)ට්ලන්ඩ්ව එක්තරා තැනක හිර කරලා මෙතන එයාගෙ ආදරවන්තිය වෙච්ච මොලී රේවන්ක්‍රොෆ්ට්ගෙ නමේ අග කොටස එහෙම නැත්තම් රේවන්ක්‍රොෆ්ට් විදිහට හදුන්වනවා.

කාලෙකට පස්සෙ මොලී කෝ(ර්)ට්ලන්ඩ්ව බලන්න ආවහම එයා මොලීව මරලා දාලා එතනින් පැනලා යනවා. මොලීගෙ පරම්පරාවෙන් පැවත එන මුණුබුරෙක් වුන ජෝනාස් (ඩොක්ටර්) රේවන්ක්‍රොෆ්ට් පසුකාලීනව කලින් කෝ(ර්)ට්ලන්ඩ්ව හිර කරලා තිබුණු තැන මනෝචිකිත්සක සහය ලබාදෙන තැනක් ගොඩනගනවා ‘රේවන්ක්‍රොෆ්ට් ආයතනය’ නමින්. පසුකාලිනව ක්ලිටස් කැසඩි ඉපදෙන්නෙත් රේවන්ක්‍රොෆ්ට් කියන ආයතනය ඇතුලෙදිමයි. උපත ලබලා මොහොතකට පස්සෙ එයාගෙ අම්මා මැරෙනවා. මේ නිසාම ක්ලිටස්ව බලාගන්නෙ එයාගෙ ආච්චි විසින්. ඒත් එයාගෙ ආච්චි ක්ලිටස්ව කිහිප විටක්ම අපයෝජනය කරන නිසා, ක්ලිටස් එයාගෙ ආච්චිවත් පඩිපෙළකින් තල්ලු කරලා මරනවා. ඊටපස්සෙ ක්ලිටස්ව හදාවඩා ගන්නෙ රොස්කොව් වගේම ලුවිස් කියන එයාව හදාවඩාගන්න බාරගත්ත ජෝඩුවක්.

ක්ලිටස්ගෙ අලුත් අම්මට හිටිය ‘ෆිෆි’ නම් සුනඛයාවත් ඊටපස්සෙ ක්ලිටස් විසින් වදදීලා මරනවා. මේ නිසාම ක්ලිටස්ට ගහන්න ගත්ත නිසා වැරදීමක් වෙලා එයාගෙ අම්මව (ලුවිස්) අත්වැරදීමක් වෙලා තාත්තාගෙ (රොස්කොව්) අතින් මරණයට ලක් වෙනවා. මේ හැමදේමත් ක්ලිටස් දකිනවා. රොස්කොව්ව අත්අඩංගුවට පත්වෙලා එයාගෙ නඩුව සිද්දවෙන කාලයේදී ක්ලිටස්ව  ‘St. Estes Home for Boys’ නම් වූ අනාථ නිවාස පරිශ්‍රයකට බාර දෙනවා. ක්ලිටස්ගෙ නොහොබිනා හැසිරීම් නිසා මේක ඇතුලදීත් එයා සෑහෙන අඩම්තේට්ටමට ලක් වෙනවා. මේ කාලය අතරතුරම ක්ලිටස් හිතින් ආදරේ කරන්න ගත්ත ගෑණු ළමයත් ක්ලිටස්ව ප්‍රතික්ෂේප කරපු නිසා ඇයව බස් එකකට හැප්පිලා මැරෙන්න තල්ලු කරලා පස්සෙ තමන්ට වද දීපු අනාථ නිවසේ ළමයි ටිකයි, එතන බාරව හිටිය කාන්තාවයි මරලා දාලා ‘St. Estes Home for Boys’ තැනට ගිණි තියනවා. කාලයත් එක්ක ක්ලිටස් දරුණු අපරාධකාරයෙක් වෙලා හිරගත නොකර පාලානය කරන්නම බැරි පුද්ගලයෙක් බවට පත් වෙනවා.

කානේජ් බවට පත්වෙන්නෙ කොහොමද?

තරුණ අවධිය වෙද්දී දාමරික මිනිමරුවෙක් වෙන ක්ලිටස්ව අන්තිමේදී සිරගත වෙනවා රයිකර්ස් අයිලන්ඩ් සිරගෙදර. මේ කාලයේ ස්ටයික්ස් සමග සටන් කරපු වෙනම් මරණයට ලක් වුනා කියලා විශ්වාස කරපු එඩි බ්‍රෝක්ටත් සිරගත වෙන්න සිද්දවුනා ඒ සාමාන්‍ය මනුස්සයෙක් විදිහට. එඩිට හමබෙන්නෙත් ක්ලිටස් හිටිය සිර මැදිරියෙම ඉන්න. එකම තැනකට වැටුනට පස්සෙ ක්ලිටස් හා එඩි දෙන්නා අතරේ ප්‍රශ්න මතුවෙලා මේ දෙන්නා නිතරම ගහගත්තා. මේ නිසාම ක්ලිටස් තීරණය කරනවා එක්තරා රෑක එඩිව මරන්න ඕන කියලා. ඒත් ක්ලිටස්ට ඒ අවස්ථාව ඒ මොහොතෙ ලැබෙන්නෙ නැහැ. මොකද මැරුණා කියලා හිතාගෙන හිටිය වෙනම් නැවත වතාවක් එඩි හිටිය දිහාවටම ඇවිල්ලා එඩිට ආයෙ එකතු වෙලා ස්පයිඩර්-මෑන්ගෙන් පලිගන්න අරමුණින් හිරෙන් පැනලා ගියා.  හැබැයි වෙනම් එඩිව බේරගන්න එද්දී වෙනම් එයා ගැබ්ගෙන හිටියෙ.

ඔව්, ගැබ්ගෙන තමයි. කොමික් වලට අනුව, කාලයකට වතාවක් සිම්බියෝට්ලගේ ඇග ඇතුලෙ තමයි මේ විදිහෙ අපූරු දෙයක් සිද්දවෙන්නෙ. වෙනම්ගෙන් බිහිවෙච්ච පැටව් එහෙම නැත්තම් වෙනත් සිම්බියෝට්ලා හය දෙනෙක් ඉන්නවා. ඒ කානේජ්, ස්ක්‍රිම්, ලෑෂර්, ෆේජ්, ඇගනී හා රයට් කියලා.

Venom මුල් චිත්‍රපටයෙදී මේක පොඩ්ඩක් වෙනස් වෙනවා රයට් කියන්නෙ වෙනම්ගෙ නායකයා විදිහට හදුන්වන කෙනකේ කියලා. මේ ලිපිය ලියන්නෙ Venom: Let There Be Carnage එහෙම නැත්තම් දෙවන Venom චිත්‍රපටය නොබලා නිසා තවත් බොහොමයක් දේවල් චිත්‍රපටය ඇතුලෙ වෙනස් වෙලා තියෙන්න පුලුවන්.

එඩිව බේරගන්න එන වෙලාවේ වෙනම්ගෙ ඇගෙ නිර්මාණය වෙලා හිටිය අලුත් සිම්බියෝට් අර එඩි, ක්ලිටස් දෙන්නා හිටිය සිර කුටියෙ අලුත උපන් සිම්බියෝට්ව හැලිලා ආසන්නයේම තියෙන ධාරකයා එහෙම නැත්තම් ක්ලිටස්ට සම්බන්ධ වෙන්න උත්සහ කරනවා. ඔහුගෙ අත හරහා ගමන් කරලා මුලින්ම ලේ වලට සම්බන්ධ වෙලා අවසානෙදි මෙතෙක් නිර්මාණය වූ ඝාතක යන්ත්‍රය ‘කානේජ්ව’ නිර්මාණය වෙනවා. එතනින් පස්සෙ මාස ගණනාවක්ම මිනි මරමින් ඒ මරපු අයගෙ ලේ වලින් ‘Carnage Rules’ එහෙම නැත්තම් මේ ඝාතනය කිරීම් වලට තමන් විශිෂ්ටයි යන අදහස ඉතීරි කරමින් ගිහින් තියෙනවා.

මේ විදිහට නිර්මාණය වුන Carnage චිත්‍රකතාත් අතිසාර්ථක වෙද්දී කානේජ්ව යොදා ගනිමින් නිර්මාණය වුන සංස්කරණ ගණනාවක්ම තියෙනවා. මේ අතරේ ප්‍රධාන විදිහට වෙන් කරන්න පුලුවන් ඛාණ්ඩ කිහිපයක්ම තියෙනවා. ඒ තමයි Minimum Carnage, Superior Carnage, Absolute Carnage, Maximum Carnage විදිහට. ඉතිං මේ වර්ග කිරීම් වලින් Maximum Carnage (මැක්සිමම් කානේජ්) එහෙම නැත්තම් ලගාවෙන්න පුලුවන් උපරිම විදිහට ශක්තින් ලගා කරගත්තම තවත් කෙනෙකුට නවත්තනවා කියන්නෙ හුගක්ම අමාරු දෙයක්.

ධාරකයන් වූ තවත් අය

වෙනම් වගේම කානේජ් වුනත් තමන්ගෙ ධාරකයා අත්හැර ගිය අවස්ථා තියෙනවා. ඒ විදිහට ක්ලිටස් හැරුනම තවත් ධාරකයින් සොයා ගිය අවස්ථාවන් තියෙනවා කානේජ්ගෙ ඒ ඒ අවස්තාවන් වලට අවශ්‍ය අරමුණු ඉෂ්ට කරගත්ත. ඒ අය අතරේ ජෝන් ජෝනා ජේමසන් (වුල්ෆ් මෑන්), ස්පයිඩර්-කානේජ් බවට පත් කරමින් ස්පයිඩර්-මෑන්ටත්, කානේජ් කොස්මික් බවට පත් කරමින් සිල්වර් සර්ෆර් වැනි අයට සම්බන්ධ වෙලා තියෙනවා. ධාරකයෙක් නැතුව වුනත් නොනැසී රැදෙන්න පුලුවන් හැකියාවක් තිබුනත් ඉහත සදහන් කල අලුත් ධාරකයින්ගෙන් වෙන් වෙන හැම මොහොතකදීම කානේජ් නැවත වතාවක් ක්ලිටස් සමග එකතු වෙලා තියෙනවා.

මීට අමතරව වරක් කානේජ්ගෙ මග පෙන්වීම යටතේ ඩොවර්ටන්, කොලරාඩෝ වලට ගිහිල්ලා එහි ජනගහනයට සිම්බියෝට්ලගෙ ආසාදනයට ලක් කරලා නගරයම සිම්බියෝට්ලගෙ රාජධානියක් කරන්න ලැස්ති වෙද්දී ඇවෙන්ජර්ස්ලා ඇවිල්ලා එයාව නවත්තන්න හදද්දී ක්ලිටස් විසින් සිම්බියෝට්ලගෙ ආසාදනය කැප්ටන් ඇමරිකා, හෝක්අයි, තින්ග්, වුල්වරින් වැනි අයවද ග්‍රහණයට ලක් කරගෙන තියෙනවා.

ශීල්ඩ් එකෙහි බිදවැටීමෙන් පස්සෙ කානේජ්ව ලොක් බොක්ස් එකක දාලා අත්ලාන්තික් සාගරයෙ සුරක්ෂිතව තැන්පත් කරලා තියෙද්දී ක්‍රේන් හා කෝල්මන් නියෝජිතයින් මේක කඩලා කානේජ්ව නො(ර්)මන් ඔස්බෝර්න්ට ලබාදීලා නො(ර්)මන් කානේජ් එක්ක එකතුවෙලා රෙඩ් ගොබ්ලින් නිර්මාණය වෙනවා. ඒවගේම ඔස්බෝර්න් ලබාදුන්න ගොබ්ලින් ෆෝමියුලා එකෙන් කානේජ්ට හැකියාව ලැබෙනවා ගින්දර පිට කරන්න. නො(ර්)මන් ඔස්බෝර්න්ට ලැබුණු මේ අවස්ථාව එයා එයාගෙ මුණුබුරා වෙච්ච නෝ(ර්මි ඔස්බෝර්න්ටද ලබා දීලා ගොබ්ලින් චයිල්ඩ් නිර්මාණය කරනවා.

මේ විදිහට කාලෙන් කාලෙට කානේජ් ධාරකයන් කරගත්ත සෑහෙන දෙනෙක් හිටියත් කානේජ් හැමදාමත් කැමතිම ධාරකයා වුනේ ක්ලිටස් කැසඩිමයි. ක්ලිටස් කියන්නෙ මිනිමරුවෙක් වෙන්නම ඉපදිච්ච මනුස්සයෙක් වගේම කානේජ් කියන්නෙ මිනිස්සු මරන්න නිර්මාණය වෙච්ච සිම්බියොට් කෙනෙක්.

ශක්තින්

1. සුපර්හියුමන් කෙනෙකුගෙ ශක්තිය – ක්ලිටස් හා කානේජ් දෙන්නා එකට එකතු වුනාම ස්පයිඩි-වෙනම් එකට එකතු වෙලා එක කණ්ඩායමක හිටියත් පරාද කරන්න පුලුවන් තරම් ශක්තියක් හැදෙනවා. ටොන් 80ක තරම් බරක් වුනත් මේ දෙදෙනා එකතු වුනාම ලැබෙන ශක්තියෙන් උස්සන්න පුලුවන්.
   
2. සුපර්හියුමන් කෙනෙකුගෙ දරා ගැනීමේ ශක්තිය – වෙඩි හුවමාරුවකදී වුනත් තම ධාරකයාට කිසිම හානියක් නොවන පරිදි දරාගන්න පුලුවන් හැකියාව වෙනම්ට තියෙනවා. 
3. සුපර්හියුමන් කෙනෙකුගෙ සවිබලය – ජලය යට, විෂ වායු පවතින තැන්වල වගේ හුදෙක්ම අහිතකර තැන්වලදී කිසිම හානියක් නොවී ඉන්න හැකියාව වෙනම් සතුව පවතිනවා. මොකද ඇතුලේ ඉන්න ධාරකයට එයා හුස්ම ගන්න වගේම පිට කරන්න වෙනම විදිහේ ෆිල්ටර් කිරීමේ ක්‍රමයක් සපයනවා.
4. සුව වීමේ හැකියාව – මේක තමයි හොදම කාරණේ. මොකද මාරක විදිහට ධරාකයාට බලපෑමක් වෙලා තියෙන තත්වයකදී පවා වෙනම්ට හැකියාව තියෙනවා වෙනම කිසිම සුව කිරීමේ ක්‍රමයකට වඩා ඒ කෙනාව සුව කරන්න.වරක් නො(ර්)මන් ඔස්බෝර්න්ට කානේජ් සම්බන්ධ වෙලා ප්ලාස්ටික් සැත්කමක් නිසා විරූපී වෙලා හිටිය නො(ර්)මන්ගෙ සැබෑ ස්වරුපය ගොඩනගන්න කානේජ්ට හැකියාව ලැබිලා තියෙනවා.
   
5. මතක ශක්තිය – සැම සිම්බියෝට් කෙනෙක්ට හැකියාව තියෙනවා තමන් ධාරකයා සමග සම්බන්ධ වුනාම ඒ කෙනාගේ මනස හා සම්බන්ධ වෙලා මතකයන් හාරවුස්සලා බලන්න. ඒ මතකයන් මතක තියාගන්නත්, ඕනෙම වෙලාවක ඒ ගැන සිහිපත් කරන්නත් සිම්බියෝට් කෙනෙක්ට හැකියාව තියෙනවා.
6. තම ධාරකයාව මනසින් ග්‍රහණය කර ගැනීමේ හැකියාව.
7. ස්පයිඩර් මෑන්ට වගේම බිත්ති දිගේ කිසිම ගැටලුවක් නැතුව බඩ ගාන්න හැකියාව සිම්බියෝට් කෙනෙක්ට තියෙනවා. 
8. නිමාවක් නැතිව මකුළු දැල් විදීමේ හැකියාව – මේ හැකියාව නම් වෙනම් එහෙම හොරකම් කරන්නේ ස්පයිඩිගෙන්. උඩ හරියේ මතක ඇතිනේ තමන්ගෙ සීමීතව මකුළු දැල් විදීමේ ශක්තිය වෙනම් ස්පයිඩිට අසීමිතව ලබා දුන්නා. 
9. ස්වරුපය වෙනස් කිරීමේ හැකියාව – වෙනම්ට හැකියාව තියෙනවා තමන්ගේ ධරාකයා සිතන පතන විදිහට ස්වරුපය වෙනස් කරන්න.
10. විසකුරු උල් දත් හා තියුණු නියපොතු -ධාරකයා සමග සම්බන්ධ වූවාට පසුව හකු වලින් උල් දත් නිර්මාණය වීමක් වගේම තියුණු නියපොතු වලට සමාන දෙයක් අත් වලින් නිර්මාණය කරනවා. මේවා සටනකදී සෑහෙන ප්‍රයෝජනවත් වෙනවා.
11. ස්පයිඩර්-මෑන්ට පිහිටලා තියෙන සංවේදක කානේජ්ට නැති වුනත් එයාට පුලුවන් කමක් තියෙනවා ඇතුලත තියෙන සෛල වලින් ඇස්, කන්, නාසය, දිව හා රසාංකුර වැනි මුළු ප්‍රතිග්‍රාහක පද්ධතියක්ම ඇතුලතින් ගොඩනගන්න.
12. කානේජ්ට හැකියාවක් තියෙනවා ස්පයිඩර්-මෑන්ට පිහිටලා තියෙන සංවේදක වලට අහු නොවී ඒවා මගහැර යන්න.
13. ඩිජිටල් පද්ධති වලට ඇතුල් වීම – අන්තර්ජාලය ඇතුළුව තාක්ෂණයෙන් බල ගැන්වෙන දෑ වලට ඇතුල් වීමේ හැකියාව කානේජ්ට පිහිටලා තියෙනවා. මේ අතරේ කානේජ් අයන්-මෑන්ගෙ සූට් එකට රිංගලා සම්පූර්ණ බලයම යෙදවීම ජනපි‍්‍රයයි.

දුර්වලතා 

1. අනෙක් සියලු සිම්බියෝට් කෙනෙක්ම වගෙ ශබ්ද තරඟ හරහා වගේම ගින්දර මගින් හැකියාව තියෙනවා කානේජ්ව අනතුරට ලක් කරන්න. කොහොම නමුත් Darkhold එහෙම නැත්තම් ශාපලද්දන්ගෙ ග්‍රන්ථය ලෙසින් හදුන්වන පොතෙහි අඩංගු වෙන භයානක බලයන් වලට වරක් කානේජ් අහුවෙලා ශබ්ද තරංග වලින් අනතුරට ලක් වීමේ හැකියාව නැතිවෙලා තියෙනවා. ඒවගේම ඔස්බෝර්න් ලබාදුන්න ගොබ්ලින් ෆෝමියුලා එකෙන් ගින්දරින් කානේජ්ව අනතුරේ හෙලන්න පුලුවන් තත්වයද නැති කරලා තියෙනවා.
   
2. ඕනෙම කෙනෙක්ව නිර්මාණය කරපු කෙනෙක් ඉන්නවනේ. ඉතින් මේ සිම්බියෝට්ලගෙත් නිර්මාතෘ කෙනෙක් ඉන්නවා. එයාගෙ නම තමයි නල්. සිම්බියෝට්ලව තමන්ට ඕන ඕන විදිහට පාලනය කරන්න මේ කෙනාට හැකියාව තියෙනවා. 
3. ඒවගේම ඇන්ටි-වෙනම්ගෙ මාරක ස්පර්ශයකින්ද කානේජ්ව අනතුරට ලක් වීමේ හැකියාව තියෙනවා.

හමුවෙමු තවත් මේ වගේම ලිපියකින්!!